you made my day
كلمة كتير بنكتبها لما نقضي يوم حلو مع حد بنحبه او مثلا حد يجيبلنا هدية حلوة في وقت غير متوقع او حد يجيبلك ورده جميله فتحس ان الدنيا بتضحكلك بس انا مش هقول كده انا هقول
you made my life
اقولها لاغلي اتنين علي قلبي الي حياتي من غيرهم ولا ليها اي معني الي ضحكتهم دي سر سعادتي
اكتر اتنين في الدنيا متاكده من حبهم ليا ... اكتر اتنين ساعدوني .. اكتر اتنين لو حسيت اني مخنوقة اجري عليهم اول ناس ....احلي اتنين في الدنيا كلها
هي بسمة او بوسي عشان بتزعل احلي حاجة في حياتي
من يوم ما وعيت علي الدنيا وهي جنبي من يوم ولادتي لحد انهارده
مفيش حاجة في الدنيا قدرت تبعدها او تشغلها عني حتي بعد لما اتجوزت
مفتكرش اننا اتخاصمنا في مرة اكتر من خمس دقايق مفتكرش اني في مرة قلبي طاوعني اني ازعل منها يعني اتعصبنا علي بعض مرتين تلاته كده وقت زهق
من يوم ما فهمت الدنيا وهي حضنها هو ادفي حضن مخزن اسراري
مع اني مليش اسرار كتير
عملنا بلاوي ومصايب مع بعض وكنا ستر وغطا علي بعض
اليوم الي منمش فيه في حضنها ميبقاش نوم
لما بصحي من النوم بتكون هي اول حاجة اشوفها واقعد العب في شعرها
لحد ما ارخم عليها واصحيها .
الوحيده الي حسيت اني ممكن اضحي بكل حاجة في حياتي عشانها مكنتش اقدر ارفضلها طلب
وكنت بحب اوي لما انفلذلها حاجة هي كانت بتتمناها في وقت هي متتوقعهوش
عشان اشوف نظرة الفرحة في عينيها
لما بخرج بنتكلم علي الموبايل طووول ما انا بره في محاضرة ا
و كورس او في وقت فراغ بين الكورسات
لما بتخرج هي ساعة مثلا بتصل بيها بال 20 مرة لحد ما ازهقها
بقلق عليها من الهوا الطاير وبغير عليها من كل الناس
ومبحبهاش تعمل حاجة الا وانا فيها
محبتش ان يبقي ليها اصحاب عشان مياخدوهاش مني
عارفة اني انانيه بس الحب بيعمل اكتر من كده
كنا بنقسم الفرح والزعل ولما تحصل مشكله نقعد نندب عليها
وبعدها نتفتح في الضحك ونقعد نهييس
اتبسط اول لما لقت نصها التاني واتبسط اكتر لما طلع واحد من احلي الشخصيات
الي قابلتها في حياتي
يوم خطوبتها نسيت ان انا المفروض احضر حاجة البسها
ولبست اي حاجة ده بس لاني كنت مشغوله انها تطلع احلي عروسة
ويوم كتب الكتاب كان ليله عشان نظبط فستانها وكالعاده نسيت نفسي
ونسيت اشوف هلبس ايه
في كل خروجاتها في فترة الخطوبة وحتي الان كابسة علي نفسها
اصلا هي مبتتبسطش من غيري :D
يوم فرحها كان اسعد ايام حياتي اول يوم ابقي فيه حلوة كده
كنت مبسوطة بجد كنت عامله شبة العسكري الي ماشي يراقب الموقف
كنت امها اليوم ده عيني مكنتش بتبص علي حد غيرها مسلمتش
علي حد اليوم ده خالص مكنتش فاضية لاي حد
يومها مكنتش عاوزاها تسيبنا وتعبت كتير لما سابتني احن قلب في الدنيا
واغلي واحده في حياتي
بعد لما اتجوزت متشغلتش عني زي ما كانو بيقولولي كانت بتراعيني
في كل وقت وبتطمن عليا علي طول وكنت معاها معظم الوقت
بيتها هو بيتي وبرتاح فيه اكتر من بيتي كمان محسستنيش باي فرق
بين قبل ما تتجوز وبعد لما اتجوزت غير انها
كانت السبب في دخول فرد زي العسل عيلتنا
نتكلم عن الفرد الجديد الي دخل عيلتنا احن اخ في الدنيا واخف دم شفته
دخل حياتنا ازاي لحد دلوقتي معرفش :D
بس كانت من احسن الحاجات الي حصلت
حنين اوييي وطيب وبيحبني وانا عارفة ده وانا حبيته وبقالي اخ حقيقي
لما ببقي مضايقة بتكلم معاه بيسمعني وبيوجهني وبحس في كلامه
انه فاهمني اكتر من نفسي
بيخمن انا مضايقة من ايه قبل لما اقول بحكيله كل حاجة بتحصل معاايا
من يوم ما شفته للنهارده وكل اسراري معاه
بيخاف عليا ودي حاجة مفرحاني يمكن عشان اخويا الكبير اتجوز
وبحكم بيته اتشغل عننا
بضايق اوي لو اضايق وبفرح اوي لما بيفرح ويضحك كده
من يوم ما شفته محسيتوش غريب بيدخل القلب بسرعة
انا اصغر منه باربع سنين بس ..بس دايما حاسه اني طفله قدامه
هو بيبقي رخم شوية لما بيبقي مضايق بيبقي مش عاوز يتكلم
واحياانا بيتعصب بس عادي اخويا بقي وانا لازم استحمله
عمري ما زعلت منه ابدا ولا عمري هزعل منه في يوم من الايام ان شاء الله
قالي كلمة زعلتني شوية "لما يجي حبيبك مش هتعبرينا"
لا مش عارف ان مهما كان الانسان الي هرتبط بيه غالي
عمره ما هيكون اغلي منهم خطيبي ولا حبيبي والي ما يتسمي الي جاي
لازم يفهم قبل ما يجي ان دول بره حسابات الغيره
والكلام ده دول حياتي واخواتي والي معاهم عشت احلي ايام والي عمري ما هنسسي فضلهم عليا ولا هنسي خوفهم عليا
والي مش عاجبه لا مؤاخذه الباب مفتوح
مش عارفة انا حاسه اني اتهبلت شوية بس يمكن عشان مزاجي رايق
والله الكلام الي انا كاتباه ده ما يجي واحد من مليون من الي في قلبي لييكو يا اغلي حاجة في حياتي
Thanx my love you really made my life